Міхась Мацвеевіч Філіповіч (1896, Мінск — 1947) - беларускі жывапiсец, графiк, этнограф, педагог. Адзін з першых айчынных мастакоў, хто звярнуўся да нацыянальнай тэматыкі.^{2 (ст. 256)}

---

Біяграфія. Нарадзіўся ў 1896 г. у Мінску. Вучыўся ў Маскве: па адной інфармацыі - у 1918 - 1920 гг. у Вольных мастацкіх майстэрнях у К. Каровіна (К. Коровин);^{1 (ст. 357)} па другой - ў 1920 - 1921 гг. (у К. Каровіна) і ў 1925 - 1930 г. (у Р. Фалька¹) у Вышэйшых мастацка-тэхнiчных майстэрнях (ВХУТЕМАС).^a

У 1921 г. удзельнічае ў першай савецкай выставе ў Мінску (супрэматычныя творы). У 1927 г. уступае ў Усебеларускае аб'яднанне мастакоў. У тым жа годзе прымае ўдзел у беларускім раздзеле савецкага павільёна міжнароднай выставы "Мастацтва кнігі" у Лейпцыгу.^{4 (ст. 52)}

У 1929 г. прымае удзел у 3-й усебеларускай выставе (карціна "Бітва на Нямізе). У 1930-х - працяглая творчая камандзіроўка ў Сярэднюю Азію.¹.

---

Творчасць. Прыхільнасць да акадэмічнага рэалізму пад час навучання ў Маскве змяняецца захапленнем імпрэсіянізмам. Пасля знаёмства з творчасцю і тэорыяй К. Малевіча пачынаецца супрэматычны перыяд. У верасні 1921 г. у Мінску выстаўляе творы "Супрэматызм", "Максімальнае выяўленне колеру", "Канструкцыю плоскасцяў".^{3 (ст. 182)}

Пасля вяртання ў Беларусь працягвае вывучаць узоры беларускага народнага мастацтва. У выніку яго вандровак па Беларусі было складзена 10 альбомаў з замалёўкамі тканін, разьбы, народных строяў.^{3 (ст. 182)}

Адна з першых карцін на народную тэматыку - "Казка" ("Казачны сюжэт"). У 1921-1922 г. стварае шэраг карцін на этнаграфічныя матывы: "На Купалле", "Вясна", "Скокі праз вогнішча", "Карагод", "Народнае гулянне".^{3 (ст. 182)}

Адначасова працуе як ілюстратар. У 1922 г. ілюструе "Босых на вогнішчы" М. Чарота.^{3 (ст. 182)} У 1924 г. стварае графічны цыкл ілюстрацый да беларускіх народных казак "Сучкін сын", "Іванка-дурачок", "Паляшук і чорт".^{4 (ст. 52)}

У 1930-х з'яўляюцца творы на сярэднеазіяцкія матывы. У часы вайны прыймае удзел у афармленні перыядычных выданняў, у тым ліку у часопісе "Партизанская дубинка". У апошнія гады жыцця працаваў у жанры лірычнага пейзажу.^{1 (ст. 357)}

(Апошняя рэдакцыя: 27.04.2009)

(Апошняя рэдакцыя: 27.04.2009)