Віталь Канстанцінавіч Цвірка. Нарадзіўся (1(14).02.1913) у вёсцы Радзеева Гомельскага павета Магілёўскай губерні (зараз Буда-Кашалёўскі раён Гомельскай вобласці) у сям'і настаўнікаў. У 1929 - 1932 г. вучыўся ў Віцебскім мастацкім тэхнікуме на аддзяленні жывапісу. Сярод выкладчыкаў Ш. Ахрэмчык, В. Руцай, У. Хрусталёў, Л. Лейтман, М. Эндэ, Ф. Фогт. Пасля заканчэння выкладае малюнак у агульнаадукацыйнай школе ў Мінску. У 1935 паступіў у Маскоўскі мастацкі інстытут (скончыў у 1942 г.) дзе студыяваў у С. Герасімава, П. Пакаржэўскага, Г. Ражскага, Б. Іагансона, А. Дайнэкі, І. Грабара.

З пачаткам вайны, у 1941 г. - эвакуацыя разам з інстытутам у г. Самарканд (Узбекістан). У Мінск вяртаецца у 1944 годзе пасля вызвалення. У 1946 годзе уступіў у Саюз савецкіх мастакоў БССР. З 1947 г. выкладае ў Мінскім мастацкім вучылішчы, а з 1953 па 1963 г. у Беларускім тэатральна-мастацкім інстытуце (зараз Беларуская Акадэмія мастацтваў). З 1956 па 1963 г. - загадчык кафедры жывапісу, а ў перыяд з 1958 па 1960 займае пасаду рэктара. Першае пасляваеннае дзесяцігоддзе не вызначана якімі-небудзь значнымі творчымі дасягненнямі.

Пачатак творчага узыходжання пачынаецца з 1954 г. ("Ля млына"). Шматлікія падарожжы па Беларусі становяцца неабходнасцю як пошук тэмаў для будучых краявідаў, якія цалкам выціснулі астатнія жанры жывапісу з яго творчасці. Толькі ў апошняе дзесяцігоддзе жыцця ён звяртаецца да нацюрморта. Пачынаючы з 70-х, разам з алейным жывапісам працуе ў акварэлі. Памер у Мінску (11.06.1993). Пахаваны на Усходніх могілках. Болшасць твораў захоўваецца ў Нацыянальным мастацкім музеі Беларусі¹.

(Апошняя рэдакцыя: 22.01.2009)